Wednesday 20 July 2011

മരിച്ചുപോയവരുടെ നഗരം


















പള്ളിയുണ്ടാവുമോ 
പള്ളിക്കൂടമുണ്ടാവുമോ 
പട്ടഷാപ്പുണ്ടാവുമോ

ഉണ്ടാവുമായിരിക്കും 
മരിച്ചവര്‍ മനുഷ്യരല്ലേ 

വയസ്സൊന്നുതികയുംമുന്‍പേ 
മരിച്ചതാണ് 
മാമിയുടെ മൂത്തമകള്‍ .
കൊല്ലം നാലഞ്ചായില്ലേ

ആരുടെ കൈപിടിച്ചാവും 
അവളിപ്പോള്‍ 
പള്ളിക്കൂടത്തില്‍ 
പോകുന്നുണ്ടാവുക 
ആരെങ്കിലും 
ദത്തെടുത്തിട്ടുണ്ടാവുമോ ?

എന്‍റെ ഭാര്യ 
മറ്റൊരാളെ കെട്ടിയിട്ടുണ്ടാവുമോ 
അവളിപ്പോള്‍ 
പെറ്റിട്ടുണ്ടാവുമോ ?

അഴിമുഖത്ത് 
മുങ്ങി മരിച്ചവന്‍ 
ഡോക്ടര്‍ ആയിരുന്നെന്ന് കേട്ടിട്ടുണ്ട് 
അവനിപ്പോഴും ഡോക്ടര്‍ ആവുമോ ?

സഖാവ് 
കുഞ്ഞികണ്ണേട്ടന്‍ 
ഉണ്ണികണാരാന്‍
അവരിപ്പോഴും 
പത്താംനമ്പര്‍ സെല്ലില്‍ തന്നെയാവുമോ 

പലിശക്ക് വാങ്ങി 
തൂങ്ങിചത്തവന്‍ 
എന്നെ പറ്റിച്ചെന്ന് കരുതുന്നുണ്ടാവും 

അവിടെയും 
നാടും ,നാട്ടാരുമുള്ളതല്ലേ
കുത്തി പിടിച്ചായാലും 
വാങ്ങിച്ചെടുക്കും ഞാന്‍ 

എന്‍റെ ടിക്കറ്റൊന്ന്
കണ്‍ഫോമാവട്ടെ 

1 comment:

  1. :)എന്‍റെ ടിക്കറ്റൊന്ന്
    കണ്‍ഫോമാവട്ടെ!!

    ReplyDelete