സമാനതകളുടെ ദൂരത്ത്

അവിടെയുമുണ്ടാവില്ലേ 

ഇതുപോലെയൊരു ദേശം..? 

തെക്കിനിയിലിരുന്ന്‌

മഴ കാണുന്ന പെണ്‍കുട്ടിയുണ്ടാവില്ലേ ..

ഓര്‍മയില്‍പ്പോലുമില്ലാത്ത ഒരുവന്‍

കൊടുത്തുവിട്ട സന്ദേശമാണ് 

മഴ 

ഉറക്കെ വെളിപ്പെടുത്തുന്നതെന്ന്‍

മനസ്സിലാകുന്നുണ്ടാവുമോ അവള്‍ക്ക്..

മുന്‍പ് കണ്ടിട്ടേയില്ലാത്ത കരയിലേക്ക് 

ഇരുന്നേടത്തിരുന്ന് 

കുന്നുകയറിപ്പോരുന്നുണ്ടാവുമോ അവള്‍ 

അല്ലങ്കില്‍ ,

പെയ്തൊഴിയുമ്പോള്‍ 

കാഴ്ചകള്‍ തമ്മിലുടക്കുമെന്ന് 

എന്നെപ്പോലെ വിചാരപ്പെടുന്നുണ്ടാവുമോ ..

മഴയെ,

മുറ്റത്ത് 

ഒറ്റയ്ക്കിരുട്ടത്തുനിര്‍ത്തി 

ഇപ്പോള്‍  വരാമെന്നും പറഞ്ഞ്‌

എനിക്ക് മുന്‍പേ 

ഉറങ്ങാന്‍ പോയിട്ടുണ്ടാവുമോ..

ഏറെക്കേട്ടിട്ടും മനസ്സിലാവാതെ,

മഴയുടെ വര്‍ത്തമാനം 

വിവര്‍ത്തനം ചെയ്യാന്‍ ശ്രമിച്ചുശ്രമിച്ച് 

അവള്‍

പരാജയപ്പെടുന്നുണ്ടാവുമോ ?