പുലര്‍ച്ച വണ്ടി

പുലര്‍ച്ചെയുള്ള വണ്ടിയും നോക്കി

ഓട്ടോ ഉരുട്ടിയുരുട്ടി 

ഓട്ടം കാത്തുകിടക്കും 

ഞങ്ങള്‍ 

അച്ഛന്റെ 

കൈപ്പിടിച്ചിറങ്ങിയവള്‍

പി .എസ്‌.സി .എഴുതാന്‍ 

ദൂരെ നിന്നാവണം

പിന്നിലിറങ്ങിയ

കന്യാസ്ത്രീകളെ കണ്ട്

ഡ്രൈവര്‍ സത്യന്‍ 

ഉറക്കെ പറഞ്ഞു 

"ഒരിക്കലൊളിച്ചോടി പോകും 

ഒരു കന്യ്യാസ്ത്രീയെയും കൊണ്ട് ഞാന്‍ " 

പെറുക്കി കിട്ടുന്ന 

മുറി ബീഡി വലിച്ച്

ഈ വയസ്സന്‍ ആരെയാവും 

നിത്യവുംകാത്തു നില്‍ക്കുന്നത്  .

ജില്ലാ കമ്മിറ്റി കഴിയാന്‍ 

ഏറെ വൈകിയെന്നാമുഖം പറഞ്ഞ്

സഖാവ് കുഞ്ഞികണ്ണേട്ടന്‍ 

വണ്ടിയില്‍ കയറും 

ഒന്നൊന്നായി 

നീങ്ങി തുടങ്ങും 

അമ്മാവു അമ്മാളുടെ 

പൂക്കൂടയ്ക്ക്‌ ചാരെ 

ഒരു മുഴം 

മുല്ലപ്പൂവിന് തര്‍ക്കിച്ച് 

പതിവ് യാത്രക്കാരിയെ കാത്തു നില്‍ക്കും 

മുടിക്കെട്ടഴിച്ചുകെട്ടി ,

ഉലഞ്ഞ സാരിയൊന്നടുപ്പിച്ച്

പുതിയ പൊട്ട് കുത്തി 

മീനുമോള്‍ക്ക്‌ വാങ്ങിയ 

ചുവന്ന റിബ്ബണ്‍ ,

കളിക്കുടുക്ക 

ഒക്കെയും ഉറപ്പു വരുത്തി 

ഇരിപ്പുറപ്പിക്കുന്നവളെയും കൊണ്ട് 

വണ്ടിയും 

ഞാനും നീങ്ങി തുടങ്ങും 

ഒരിക്കല്‍ 

കാര്യമായി തന്നെയാണ് ചോദിച്ചത് 

നാളെ 

നിന്നെയും കൊണ്ട് 

എന്റെ ജീവിതത്തിലേക്ക് 

ഓട്ടമെടുക്കട്ടെ .

ഉറക്കച്ചടവുള്ള 

ചില്ലറ 

എണ്ണിയെണ്ണിതരുമ്പോള്‍ 

വ്യക്തമായും കേട്ടു 

ചത്തുപോയ കെട്ടിയവന്‍ 

ഇടിച്ചിടിച്ച് 

പഴുപ്പിച്ചാണ് 

ഈ പണിയെടുപ്പിച്ചത് 

പേടിപ്പിക്കല്ലേ സാറേ ..

ജീവിതം കാണിച്ച്  

പേടിപ്പിക്കല്ലേ സാറേ ..