സ്വകാര്യതയോടെ ഒരു കുത്ത് വാക്ക്

രണ്ടില്‍ 

നിര്‍ത്താമായിരുന്നെന്ന്

പലരും പറഞ്ഞു

അവള്‍ 

മൂന്നാമതും 

പെണ്ണിനെ പെറ്റപ്പോള്‍

ആണോ ,

പെണ്ണോ 

തീരുമാനം 

പടപ്പിന്റെയല്ല

പടച്ചോന്റെയെന്ന് 

ചുരുട്ടി നീട്ടിയ

നോട്ടുകെട്ടുകള്‍ 

വാങ്ങാതിരുന്നത് കൊണ്ടാണ് 

വില്ലേജിലെ ഗുമസ്തപണി

പുറമ്പോക്കിലേക്ക് മാറിയത് .

ആധാരം 

അടിയറവ് പറഞ്ഞ്

പൊന്നും പണവും 

കൂട്ടിവെക്കുമ്പോഴേക്കും 

കെട്ടിക്കാത്തപെങ്ങളുടെ 

പേറെടുക്കേണ്ടിവന്നു .

കതകടച്ച്

കഷ്ട്ടപെട്ടാണ് 

ഞരമ്പിലെ 

കെട്ടികിടന്ന ചോര 

ഒറ്റ ബ്ലേഡ് കൊണ്ടൊഴുക്കി വിട്ടത്  

നിസ്ക്കാര പായിലിരുന്ന് 

313 ബദരീങ്ങള്‍ക്കും

നേര്‍ച്ച  വെച്ചാണ് 

ഉമ്മ 

എന്‍റെ ജീവന്‍ 

തിരിച്ചുപിടിച്ചത് 

പടച്ചോനെ 

പ്രായപ്പൂര്‍ത്തിയായ 

ചെറുപ്പക്കാരനല്ലേ  ഞാന്‍ 

എനിക്കും വേണ്ടേ 

ചില സ്വാതന്ത്രങ്ങളൊക്കെ 

ഇങ്ങളെന്തിനാണ് 

എന്‍റെ കാര്യങ്ങളില്‍ കയറി 

എപ്പോഴും 

ഇടപെട്ടുകൊണ്ടേയിരിക്കുന്നത് .